早前,余文樂(樂仔)於社交網站貼出同台灣「皮帶大王」千金王棠雲睇日落嘅親密合照,高調承認戀情後,引嚟一班網民不滿,紛紛留言炮轟樂仔「消費」內地女星周冬雨呢段緋聞。得唔到粉絲祝福嘅樂仔,嬲豬喺Instagram發文話:「就算我真的是談戀愛了,有必要說話那麼狠,那麼傷人嘛。我知道我是公眾人物,但我生活的每一步難道真的需要每個人評審過我才能走嘛。這段時間你們的留言真的很讓人痛心……我真不希望2017年會是一個這樣的開始。」
不過,經過一晚沉澱後,樂仔今朝又喺Instagram貼出一張健身嘅相,仲話要努力工作趕走負能量。