謝霆鋒爸爸謝賢（四哥），2015年和曾江拍攝旅遊節目《4個小生去旅行》積怨，最終令到四哥在記者會上當眾怒摑曾江，事件震驚全城。事隔多年，四哥日前出席公開活動時重提此事，他自言和曾江一直都好老友，大爆當年怒摑一事是大家夾定做戲搏宣傳，大嘆事後被擺上枱，被公眾指摘受盡委屈好陰功。 （文：植筱詩）
恢復單身後，謝賢直言生活孤獨好枯燥。
日前，四哥現身香港尖沙嘴出席活動，他心情大靚，遇上記者滔滔不絕，大讚霆鋒深得自己真傳，烹飪了得，並笑言：「佢連記者都搶埋我，我冇得撈，啲記者都唔理我，好嬲佢.。」問到霆鋒是否有買樓孝敬他？四哥說：「買嚟做乜？佢都費事我搬嚟搬去，將來都係佢.啦。」
謝賢大讚兒子謝霆鋒深得自己真傳，烹飪手藝了得。
自爆孤獨冇拖拍
早前，有報道指81歲的四哥和小他49歲的內地女友CoCo已經分手。對此，四哥直認單身，並指孤獨生活好枯燥，幸好之前霆鋒有找他拍節目：「真係好悶，起身就望住個海，早餐食飯都係一個人，好枯燥。有嘢搵我做就開心啲，因為真係好似坐監咁，而家《12道鋒味》都有搵我出下鏡，搵返兩個錢自己使，係咪都有啲嘢做下，一條『冷』，屋企又大。」
謝賢直認和年輕49年的內地女友CoCo已分手。
不過問霆鋒感情事
被問到「未來新抱」王菲是否有來探他？四哥表示：「探都係探個仔啦，做乜嚟探我？」。他直言，不會過問霆鋒的感情狀況，自己拍拖亦不會向所有人交代。他又透露不介意再拍旅遊節目，問他會否慎選合作對手，不會再和有積怨的曾江合作？四哥聞言突然大爆內幕：「黐線嘅！我哋而家唔知幾Friend，當時其實係做戲！」
請曾江食雪糕賠罪
記者聞言大讚四人真好戲，四哥亦讚同：「真到不得了！」講到當時修哥被打甩眼鏡，他笑謂：「佢自己做.嘛，佢用手指撳住個眼鏡，佢好好戲，係老戲骨，好戲過我哋好多。」問四哥事後是否有請曾江食飯賠罪？他說：「打完之後即刻請佢食雪糕，等佢凍番。做電影出盡辦法宣傳，幾衰呀，係我謝老四先咁蠢。」他又爆出手的本來是修哥，但由於他講話口窒窒，所以自己才頂上。
謝賢當年當眾怒摑曾江，事件震驚全城。
攞完彩事後無癮
四哥於2015年，與曾江、胡楓（修哥）及Joe Junior齊齊宣傳TVB旅遊節目《4個小生去旅行》的記者會，四哥疑於拍攝期間與曾江有積怨，竟然當眾出手怒摑曾江！ 修哥勸交時被打飛眼鏡，場面一片混亂。四哥突然大爆當時只係做戲，「怒摑」一幕是他們四人一齊商量搞噱頭宣傳，最後就決定由四哥「出手」！四哥笑言打完一巴攞晒風頭，不過事後個個都指摘他，令他一直感到好無癮、好陰功！
謝賢爆當年「怒摑」事件是四人夾定搞噱頭。
下載APP