驚動娛圈的「安心事件」發生接近一年，事件女主角黃心穎一直以來試過避走美國，即使返回香港後都一直保持低調。不過近日有香港傳媒訪問她時，她言語中似暗示自己仍對娛圈未死心，坦言無想過轉行。而身為黃心穎的前男友馬國明（馬明），昨日（9日）出席TVB電視城新劇《BB大晒》進行的拜神儀式，提到黃心穎及另一緋聞女友唐詩穎的事，他都化身「護花使者」，特別問到會否支持心穎復出，他說：「我支持佢嘅！」（文：黎永樂 ）
馬國明請求傳媒放過唐詩詠，亦表明希望黃心穎繼續努力。
黃心穎趁這段超得閒的時間照顧家中小狗，不愁生計。
自去年偷食事件後被判「死刑」的黃心穎，連月來一直「放大假」無工開。她承認從未想過轉行，問到是否等待機會翻身？她則以「隨緣」兩字回應，又表示靠之前買下的樓盤收租，生活絕對不成問題。無綫最近鬧花旦荒，有記者問她可有想過復出？她言語間帶點保留：「呢樣嘢我冇乜接觸，亦冇乜去諗，遲啲先算啦！至於我有乜打算？呢一刻又冇喎！冇諗咁多呀，都係好隨緣。」提到她之前傳出轉做地產行業，她非常不解為何會這樣傳：「我唔係好明點解會咁講，真係冇諗過會做。」
新劇演粗人愛上女神
剛巧，心穎前男友馬明昨天出席新劇《BB大晒》拜神儀式，此劇原本是李佳芯孖黎諾懿主演的《BB來了》續集，不過今集則換上馬明配搭女神岑麗香（香香），馬國明自嘲他在劇中會「癩蛤蟆想食天鵝肉」娶得女神香香為妻，他笑說：「劇裡面我係一個粗人，香香就係文青女神，我睇完劇本都唔明香香點解會揀我，不過，佢（劇中角色）就好專一，一心一意對老婆。（似你咁專一？）戲內啫，戲外就唔知喇，係男人都花心，諗吓都好呀。」
馬國明不忍心唐詩詠被寫大咗肚，更說這樣寫於心何忍呢。
直指「唐詩詠懷孕」好假
馬明在活動上接受訪問，最近他被指做第三者介入唐詩詠與「英識教育」創辦人陳思銘的戀情，甚至傳出搞大唐詩詠個肚，令他嬲爆扯火，他說：「其實唔係好憤怒，可能隔住個電話回應有咁嘅錯覺，不過都清清楚楚講番件事。我唔想喺詩詠同男仔之間有我個名，我真係唔知佢哋係咩關係。好似拍《On Call 36小時》我都唔知羅仲謙同楊怡拍拖，我做人不嬲都唔八，我係好抗拒人哋寫我係第三者，好似胡杏兒同黃宗澤分手又話係第三者，我都即時出嚟澄清。」馬國明又指傳唐詩詠懷孕實在太假，他即護住對方：「呢啲新聞對女仔嚟講唔好聽，咁樣寫又於心何忍呢，緋聞笑吓冇所謂。
馬國明將再與岑麗香合作演出新劇《BB大晒》。
懶理黃心穎紋黑玫瑰
講到舊愛黃心穎被發現腳上有個新的黑玫瑰紋身，馬國明笑說：「我又唔知，佢自己鍾意啦，唔可以代表佢發言。不過我就唔會紋身，因為我好花心，我驚今日紋咗，聽日又唔鍾意要剷咗佢。」提到心穎稱自己無意轉行，仍等待復出機會，他即開腔護前度：「我支持佢嘅，每個朋友我都想佢好，呢啲等公司安排，有好多嘢唔使睇得太重，唔好一樣嘢就抹煞晒人哋多年嘅努力，希望佢會繼續努力，希望大家會對佢改觀。」
下載APP