高海寧借勢開拓內地市場

高海寧在《三十而已》怒摑「小三」江疏影。（劇集花絮照）

狂迷根據劇中一幕出現的「趙靜語」電話號碼，撥打該電話號碼找她算帳。（《三十而已》截圖）

高海寧在《迷網》中擔正第一女主角。（TVB劇照）

33歲無綫上位花旦高海寧（高Ling），近日幕前曝光率激高；連續三部播出的TVB黃金時段劇集都有她的擔正演出，當中《迷網》更是第一女主角，就連現時在內地熱播的劇集《三十而已》，高Ling都有份客串。

今日（17日）有報道指劇中高Ling飾演的「趙靜語」，一幕跟內地當紅女星、飾演小三的江疏影的爭仔戲碼，高Ling怒摑對方睇到觀眾咬牙切齒，更大讚高Ling勁好戲。結果有部分劇迷睇得太過入戲，竟然走去搵高Ling「尋仇」！狂迷根據劇中一幕出現的「趙靜語」電話號碼，撥打該電話號碼找她算帳。然而，真正的電話號碼主人卻成為苦主，並埋怨指半個月來日夜均收到來自香港、內地、美國、日本及遠至俄羅斯的匿名電話及短訊騷擾，更指名要找「趙靜語」，其中更有人用普通話大罵：「你這個婊子（妓女）！」

而高Ling今日出席新劇《反黑路人甲》的宣傳活動，亦有談到演出的內地劇反應熱烈，更遭狂迷打電話「尋仇」，高Ling表示：「都係0.1秒嘅Shot就畀人Cap咗！但都想同事主講聲唔好意思，騷擾到人哋，我都有責任，但個事主冇嬲，仲因為咁睇套劇，不過套劇另一演員都有同一遭遇，我係第二個。（套劇令你爆紅喎！）本身套劇熱度夠，又多人關注啫！（片酬升幾級？）唔好咁講，冇咁嘅事，但係有製作公司搵我，要睇公司安排。（想開拓內地市場？）有機會都想試吓。」（編輯：黎永樂）