最近拍得如火如荼嘅荷里活電影《狂野時速8》，原本仲有個零禮拜就可以順利煞科。日前，主角之一嘅狄維莊遜於Instagram 突然發火，大罵戲中某男拍檔諸多推搪，一啲都唔專業。消息曝光後，唔少網民猜測狄維莊遜針對嘅，係今集新加入嘅名導演奇連伊士活兒子Scott Eastwood。但勢估不到，其實狄維莊遜唔妥嘅係身兼演員同監製嘅大隻佬雲狄素。
《 狂野時速8》原本就快埋尾，點知搞出個大頭佛。
據美國娛樂網站TMZ報道，雲狄素作為電影監製，作出嘅決定令狄維莊遜非常不滿，而且兩個人分歧愈嚟愈大，加埋雙方自尊心都好強，搞到現場氣氛好緊張。原本電影正進入埋尾階段，但因為兩人矛盾加深，令電影陷於停機狀態。
報道指狄維莊遜爆大鑊後，雲狄素有搵佢開會，嘗試解決問題，但就唔知有冇傾掂數，仲話而家成個劇組都不滿狄維莊遜，事關佢喺拍攝尾聲搞出個大頭佛。
狄維莊遜（右）突然發火大罵身兼演員同監製嘅雲狄素。
下載APP