洪永城宣布迎娶女友梁諾妍，有情人終成眷屬。
身為洪永城好友的黃翠如，一早知對方要做老襯，並向好友送上祝福。
洪永城與梁諾妍在運動場上影婚照。
梁諾妍爆洪永城於廁所內求婚，過程既爆笑又不失浪漫。
洪永城表示娶到梁諾妍是他的福氣。
37歲TVB藝人洪永城（Tony）在2019年承認與梁諾妍（Inez）拍拖，拍拖期間兩人屢傳婚訊，不過二人多次否認。直到今年初，Tony終於漏口風，表明希望明年可以派雙封利是。如今有情人終成眷屬了！昨日（10日）兩人正式公告結婚大喜訊，這對準新人由求婚到影結婚相，也是充滿著無限溫馨及成籮笑料，Inez回想在洗手間求婚過程笑到喊，結婚照則配合兩人性格，簡約之中不失搞笑本色，從今兩人願餘生一起笑住過！（文：黎永樂）
早前，Tony和Inez秘密地影了一輯極有創意又搞笑的結婚照，由於他們均是熱愛運動之人，所以結婚照也甚具動感，衣著以簡約便服為主，其中一款是他們以背心T恤、短褲加波鞋在運動場上飛躍而起，最搞笑是Tony以白T恤配煲呔，而另一款則是在湖邊的溫馨鬼馬相，一身背包行山Look，襯返洪永城喜歡周圍出走的性格。兩人雙手緊握在一起，寓意他們手拖手，今後一起笑住過！
正籌備婚禮預今年舉行
即將成為人夫的洪永城表示：「我喺年初已求婚成功，目前正著手籌備婚禮，計劃在今年內舉行，確實日子稍後公布。」他亦有在社交平台上宣布喜訊，並分享結婚感受，Tony說：「由一齊跑步、到傾電話、睇日出、拍拖、不計劃的旅行、到扮攰逃避跑步、通宵睇動漫、同居、到我們至愛Coco離世、到開工連晚安早晨都沒有機會同你講、到今日一齊攜手踏上我倆的新旅程好在有你，緊握我手，我希望一世都有你在身旁，追到你是我的僥倖，娶到你是我的福氣。Let’s get Married！」
黃翠如恭喜好友做老襯
而女友梁諾妍則說：「下半生手拖手，繼續一起跑下去，繼續跑去世界每個角落，感恩遇到你，常常帶給我歡樂，照顧我陪我通宵睇動漫睇網球比賽，工作上的互相扶持願餘生我們也要一起笑住過！#我們結婚啦！」至於Tony的「紅顏知己」黃翠如，對於好友即將做老襯，她表示：「當然知道呀，說不出的感動，終於見證佢長大了，叫佢十年前爭我嗰500蚊快啲還畀我，如果唔係唔打隻金豬畀佢！」
辦完大事即Say Yes
準新娘子Inez透露Tony的求婚過程，既搞笑又感人，她笑說：「佢嘅求婚過程係好好笑，好多蝦碌嘢發生，佢喺屋企個廁所度求婚，我覺得好好笑，不過好係佢嘅 style，成個過程我係笑到喊，不過都好感動，有晚佢拍完嘢返屋企，就入咗廁所一陣出嚟，跟住到我人有三急入廁所，佢又跟住我入廁所，當我打開廁所門，原來佢喺廁所度布置咗有一個攝錄機，又喺洗手盆度放咗啲微型燈泡，又有一束鮮花，鏡上又貼咗啲心型卡，仲寫上MARRY ME？我好笑又感動，我問佢點解要喺洗手間求婚？佢話知道我一定會去洗手間，最好笑係佢拎隻戒指出嚟求婚時候，我話我真係好急，你等一等我去完廁所先，結果佢要等我辦完大事再求婚，我就Say Yes！」果然浪漫得來又搞笑！
下載APP