港姐出身嘅30歲女星王君馨，憑TVB劇集《城寨英雄》中「花曼」一角成功上位。噚日，王君馨被爆於本月16日，同長跑11年嘅圈外男友Daniel秘密入紙結婚。消息傳出後，王君馨接受訪問時承認婚訊，佢話：「收到好多朋友嘅祝福，多謝大家。我而家準備去返工，今日要拍十幾場戲，祝福我。」而遠在加拿大嘅鍾嘉欣，亦第一時間為好姊妹送上祝福：「為她感到非常開心。」
王君馨於本月16日同拍拖11年嘅男友秘密入紙結婚。
王君馨同男友Daniel曾於2013年一齊去台灣旅行，當時有傳兩人預支蜜月。但王君馨話同男友都係基督徒，去旅行係分房，堅持唔會發生婚前性行為。早前，王君馨自爆Daniel求婚成功，佢話唔想結咗婚都繼續分隔兩地咁辛苦，所以希望男友喺香港發展。Daniel為咗娶得美人歸，不惜犧牲事業將基地搬去香港，如今兩人終於拉埋天窗，真係恭喜晒！
得知王君馨嘅婚訊後，鍾嘉欣第一時間為好姊妹送上祝福。
下載APP