高士德一帶中堅老店雲集，同時新食店亦愈開愈多，冇番啲噱頭真係唔可以突圍而出！位於海濤商場、主打新派菜的「M2 Kitchen」近期就成為唔少女生流連之地，不但食物創新，以木材為主調的環境再加澳門少有的花園式露台，真係超啱到場Selfie扮文青！
坐在園林式的露台就是「M2 Kitchen」最「呃like」的地方。（李國星攝）
除咗有外表，餐廳亦有內涵，主廚鄧師傅足足有32年入廚經驗，多款菜式都是出自他手，例如融合東西方風味的「煙鴨胸沙律」，用法國鴨胸配新鮮沙律菜，再淋上日本味十足的紫菜汁，酸酸甜甜，勁開胃。若然想食得重口味啲，可以試「燒汁BBQ豬仔骨」，豬仔骨選用肉質較滑的巴西貨，用秘製醃料醃足幾個鐘先入爐烤焗，一上檯即時飄來陣陣的燒烤味，肉質鮮嫩，不帶羶味，豬仔骨亦吸盡了醃料的微辣，十分惹味。
煙鴨胸沙律 MOP68
鴨胸煙韌，加上蟹籽和紫菜汁，十分清新。
燒汁BBQ豬仔骨 MOP95
為了令豬仔骨更加入味，整個烤焗過程需時20分鐘。
「飯餅」有驚喜
不過要數最特別，一定是「香燒大蝦煎意大利飯餅」。看外表只是放隻大蝦在飯餅上面，其實內有乾坤。海蝦開邊煎香，蝦肉結實彈牙，再吃清甜的車厘茄和茄子，清一清味蕾。飯餅有別於一般意大利飯，師傅先將意大利飯加巴馬臣芝士及忌廉煮到軟腍，然後再煎成金黃色。意大利飯餅外邊微脆內裡軟滑，但又沒有像一般意大利飯般稠膩，反而有點像包著芝士的飯團，口感比較煙韌，值得一試！
香燒大蝦煎意大利飯餅 MOP94
意大利飯餅相當創新但邪惡度十足，所以儘量不要獨食。
熱拿鐵 MOP35
駐場咖啡師Curry最擅長拉花，每杯經過他手的Latte馬上變成一幅圖畫。
餐廳裝潢以木和植物作主題，感覺很Raw！
下載APP