加國結婚幸福滿瀉

現年32歲，有「香香公主」之稱的宅男女神岑麗香（香香）在溫哥華正式拉埋天窗，並在200名賓客的見證下行禮，圈中好姊妹苟芸慧、李亞男及鄭欣宜亦有到場。在行禮期間，香香更開心到眼濕濕。一對新人接受傳媒訪問時，兩人十指緊扣，又兩度錫錫大放閃光彈。談到造人計劃，香香笑稱：「生住第一個先！」

一對新人在200名賓客的見證下行禮。

香香和圈外才俊強強在加拿大溫哥華行禮，剛成為人妻的香香流露出幸福表情，她興奮對傳媒宣布：「我啱啱正式結咗婚啦！」問到強強大家該如何稱呼他老婆時？廣東話不太靈光的強強笑說：「強嫂啦！」問到他如何稱呼自己老婆？他就笑說：「會叫香香，但喺屋企就叫佢蕉蕉嘅！香蕉嘛！」

香香和強強兩度錫錫大放閃光彈。

強強當眾怪責老婆

談到早上的接新娘環節，香香笑言辛苦了老公和伴郎團：「佢哋好大犧牲，差啲嘴對嘴，仲要用腳趾食提子，辛苦你哋啦！」雖然中文能力不佳，但強強在此時亦插嘴：「唔係我哋，係辛苦我呀！」問到會否埋怨老婆？強強搞笑說：「都會呀！」但之後問到香香有幾好？強強就說：「好、好、好！」

計劃在香港生活

香香又表示婚後會去一個短旅行，之後再回港工作，她說：「正式的Honeymoon還未知，但之前牧師、朋友同婚前輔導都話一對新人搞一個婚禮，要面對好大壓力，所以要快啲去一個旅行放鬆下，去完先再計劃度蜜月，但之後都要返香港開工。」講到婚後是否會繼續Long Distance？香香就話：「唔想！而家安排點樣一齊喺香港生活！」

接受傳媒訪問時，兩人十指緊扣，十分恩愛。