Angelababy同鍾漢良主演嘅內地古裝新劇《孤芳不自賞》，於本月2日首播後，引來大批網民熱烈討論，有人質疑套劇「造假」，包括假景、狂用劣質CG、甚至兩名主角都係狂用替身，再Key頭像上去。有網民爆料話Baby同鍾漢良以天價1.2億人民幣接劇，但由於兩人檔期好密，只可以畀到幾十日時間拍攝，最後更因種種原因，兩人真正面對面拍對手戲嘅日子，只得兩日。
對此，《孤芳不自賞》總製片人趙建瓴喺微博發長文，指網民提出嘅「綠幕摳像」拍攝手法，喺目前影視製作中非常普遍，如果最後呈現嘅視覺效果未能達到大家認同，製片方深表歉意。趙建瓴強調鍾漢良從小有武俠夢，騎馬、吊威吔都親力親為，絕對係真人演出。佢又大爆拍攝後期，Baby已懷有兩個月身孕，仍著上厚重戲服同捱住高溫拍攝，最終搞到中暑暈倒，但都冇因為身體原因耽誤進度。
下載APP