炸彈慘劇後首現身

日前，美國人氣小天后Ariana Grande喺英國曼徹斯特舉行嘅演唱會散場時，發生自殺式炸彈襲擊，造成至少22死逾59傷，死者包括一名八歲女童，消息震驚全球。「伊斯蘭國」（IS）承認責任，警方已拘捕一名疑涉案23歲男子。Ariana雖然喺事件中冇受傷，但亦大受打擊，慘劇發生後佢即喺Twitter發文：「心碎，我從心底很抱歉，無言以對。」目前，Ariana已從英國飛返美國佛羅里達州Boca Raton市嘅寓所。

Ariana Grande演唱會散場時，發生自殺式炸彈襲擊。

炸彈襲擊事件後，首度露面嘅Ariana一臉愁容，其男友Mac Miller更喺停機坪迎接，佢一見面立即親吻Ariana及抱抱安慰。對於Ariana目前正展開全球巡迴演唱會，美國CNN報道指原定本周四及周五喺倫敦舉行嘅兩場演出將要取消，而直至6月為止，於比利時、波蘭、德國、瑞士、法國、葡萄牙、西班牙及意大利等各站亦將要叫停，暫時未知受影響嘅演唱會將補辦或作其他安排。

Ariana一臉愁容返回美國，男友一見面立即親吻安慰。