現年33歲嘅香港男歌手陳柏宇,同31歲模特兒女友符曉薇拍拖五年,感情穩定,並曾屢次傳出婚訊。早前,陳柏宇帶女友返加拿大見家長,並宣布將於今年7月2日,兩人拍拖紀念日當天, 筵開38席拉埋天窗。日前,有消息話陳柏宇同符曉薇已低調入紙排期註冊。喺結婚通知書上,陳柏宇用回原名「陳廣偉」,而符曉薇嘅職業係文員,至於地址欄兩人報稱住同一單位。
陳柏宇將於今年7月2日,喺拍拖紀念日迎娶女友。
消息傳出後,有香港媒體致電恭喜符曉薇,佢興奮話:「多謝,之前唔知結婚前原來要請律師,7月2日當場簽紙要遞紙申請結婚,而家先知,好在趕得切去遞紙,我哋兩個都唔清楚流程。」符曉薇話酒席已由32圍增至38圍,問到請咗邊啲圈中好友?佢話:「我知佢(陳柏宇)有請江若琳,姐妹團就有少女標本嘅許雅婷,兄弟團就冇娛樂圈嘅人。」
陳柏宇同符曉薇拍拖五年,曾屢次傳出婚訊。