「男神」古天樂（古仔）雖然曾經以歌手身分出碟，但實情他心底裡最抗拒唱歌。日前，古仔出席「香港電影工作者總會」春茗時，突然全場起哄要他上台唱歌。雖然古仔一臉無奈，但見大家情緒高漲，亦表現風度開金口唱出其金曲〈男朋友〉。事後，相關短片被上載到社交網站，有網民質疑王梓軒與古仔扮Friend，更直指他遭古仔「藐爆」。
古天樂雖然曾經以歌手身分出碟，但他不止一次表示最抗拒唱歌。
日前，古仔以新任「演藝人協會」會長身分，出席「香港電影工作者總會」春茗，被J.Arie、王梓軒、小肥、RubberBand等人「脅持」上台，原本Live Band彈緊〈月亮代表我的心〉，被王梓軒強行叫停兼改彈古仔18年前的經典舊歌〈男朋友〉。一班人大合唱起哄，雖然古仔一臉無奈兼尷尬，但仍禮貌接咪唱了幾句歌詞，成為全晚高潮。
全場起哄要古仔上台唱歌，古仔一臉無奈唱出其經典金曲〈男朋友〉。
古仔高歌全場High爆
由於古仔實在太久沒有公開唱歌，所以全場賓客都好興奮，J.Arie和王梓軒更分別於Instagram上載古仔上台獻唱的片段，兩個都指自己「獨家」。王梓軒表示，完全想不到古仔會上台，J.Arie興奮寫道：「人生有咩癲得過喺古天樂古先生面前，大大聲聲唱佢嘅金曲〈男朋友〉，佢中途真係有開金口唱.，好爆……真係好爆，因為從來無人夠膽喺佢面前唱！」
小肥（左）及J.Arie（右）現場拉住古天樂合照。
王梓軒表現興奮
本來古仔再開金口唱歌是開心事，但相關短片被上載到社交網站後，有眼利的網民發現，王梓軒在片段中表現太興奮，畫面見到他High爆舉高手，主動向古仔擊掌Give me five，但古仔完全沒有反應，最後王梓軒只好尷尬把手放低。有網民質疑王梓軒與古仔扮Friend，更指他遭古仔無視：「古生眼神中閃過一絲嘅憤怒。」
王梓軒被指和想古天樂扮Friend擊掌，卻慘遭對方無視。
拍攝角度惹誤會
對網民的評論，王梓軒坦言沒有太介懷，認為是拍攝角度問題令大家誤會：「我睇到報道之後都覺得好好笑，其實當時大家拍緊拍子揮緊手，可能條片嗰個角度好似係我伸手畀古生咁，但其實係好平常咁『Yo! 』 ，好開心嘅！但係嗰晚係真係好高興，新一屆演藝人協會無論會長定理事，我哋嘅士氣都好高昂，好多大嘅Project想做。」
王梓軒不介意網民的苛刻評論，認為是拍攝角度問題令大家誤會。
古仔事前不知情
王梓軒解釋古仔事前並不知情，是大家即興拉他上台：「之後我哋都同古生講咗唔好意思，無啦啦拉咗佢上台，其實佢事前唔知道。當時佢喺隔籬房，我哋一時興起就搵佢，佢都好大方，肯上嚟同我哋玩。我哋度呢個表演嗰陣都係諗住唱畀佢聽，但真係估唔到佢會上台。」王梓軒指當晚大家都玩得好開心：「冇(火羅)嘅！大家都好開心，亦都非常感激會長同我哋一齊玩。」
下載APP