一向是無綫綜藝節目收視福將的「獎門人」曾志偉，日前有報道指他因與無綫對著幹而犯下三宗大罪，包括招兵買馬撑亞視、亮相ViuTV節目講波，並串爆香港小姐質素每況愈下。就前日「完全未驚過」的志偉出席代言月餅活動時又嚟料，接受訪問時狂串無綫。有關舉動頻頻得罪相關高層，令無綫終向他下封殺令，禁止他為港姐競選做司儀，呢鋪無得打和！ （文： 黎永樂）
曾志偉連ViuTV錄影廠都去埋，此舉睇怕等同與無綫割蓆。
方丈份人好小器，今次輪到曾志偉辣㷫無綫高層，禁絕他亮相無綫任何節目，特別是準備舉行的《香港小姐競選2018》，一向對該司儀位置又愛又恨的志偉終未能幫手為今屆港姐選美搞氣氛，就連與志偉十分老友的無綫親生仔陳百祥都開口承認志偉串無綫十分小器：「佢睇唔起TVB！」其實志偉與無綫關係趨向惡化，盛傳是由他一度與無綫綜藝科高層余詠珊不和時開始。雖然志偉亦有應邀出席上年台慶，不過他一直心存芥蒂，且連犯三宗罪觸怒TVB，致令TVB決定封殺他。
曾志偉在無綫的「獎門人」Icon深入民心， 為觀眾帶來無限歡樂。
有傳曾志偉和無綫綜藝組揸Fit人余詠珊不和，令志偉與無綫關係漸漸惡化。
倒戈相向撑隔離台
其中有兩宗罪都與隔離台亞視和ViuTV有關，有指志偉曾於2016年亞視熄機時，幫對方周圍找投資者兼大挖角，並親自組新綜藝班底撼無綫，最終未能成事，無綫以志偉出自「玩玩吓」的心態而放過對方；不過他又「唔識死」倒戈亮相ViuTV的《Good NightShow全民睇波派對》節目，以明星足球隊成員的身份於世界盃期間擔任嘉賓，與ViuTV合作講波，並應ViuTV之邀到俄羅斯欣賞世界盃決賽，更講到明日後不排除再度合作，成為他被封殺的導火線。
曾志偉亮相ViuTV的《Good Night Show全民睇波派對》節目講波，此舉激嬲無綫。
曾志偉「夠膽死」應ViuTV之邀到俄羅斯欣賞世界盃決賽，擺明剃無綫眼眉。
阿姐汪明荃孖住志偉睇世界盃決賽，不過阿姐就好識做完全無亮相過ViuTV。
早前一眾明星足球隊成員應ViuTV邀請到俄羅斯睇世界盃。
笑爆港姐拍外景「咁遠呀？」
不過最大罪還是他不斷狂踩港姐節目。上年9月他接受傳媒訪問時已經對港姐決賽以四個字來形容：「慘不忍睹！」直到前日志偉以代言人出席月餅活動時，被問到有否留意今屆港姐，雖然他先有向無綫留一線讚今屆佳麗質素比往年好，但之後就取笑TVB安排佳麗到香港西貢取景拍特輯，他說：「越南個西貢？（香港西貢！）原來係香港個西貢，西貢咁遠呀？離將軍澳好遠喎！（失色咗？）我自己就鍾意以前嘅模式，可以不斷更新嘅，但有啲嘢係需要保留原味先好睇。」敢作敢言完全無懼封殺。
志偉以代言人身份出席月餅活動時暗嘲港姐外景到香港西貢拍攝認真「夠晒遠」。
下載APP