劉德華遭群星 求飛兼點唱

劉德華（華仔）相隔八年，再度於今年底登上香港紅館舞台，一連舉行20場「MyLove Andy Lau World Tour」跨年演唱會，早前信用卡預訂一日之內已全部售罄，反應熱烈。除了大班粉絲撲飛，不少圈中藝人亦十分期待。當中古天樂、林嘉欣、吳卓羲、劉心悠、陳家樂、周秀娜等等紛紛拍片求門票，兼想點唱心水歌曲。（文：植筱詩）

劉德華相隔八年，再度登上香港紅館開個唱。

陳家樂公開索飛吻

不得不提的還有陳家樂，他漏夜買底褲，將華仔的〈暗裏着迷〉MV經典還原。但由於華仔輪廓比較深，所以化妝時特別加深鼻骨同顴骨陰影：「放飯時間妝都冇落，食食吓，隔離枱誤認咗我係劉德華，勁開心。」家樂不僅向華仔求飛，還靦腆的想求埋「飛吻」。

陳家樂將劉德華的〈暗裏着迷〉MV 經典還原。

華仔多年來唱出不少經典金曲，一班「星級」粉絲為了今次演唱會可以聽到自己的心水飲歌，除了拍片點歌之外，更大展歌喉，扮華仔招牌動作唱腔瞓身演出。林嘉欣坦言最愛〈如果我有事〉，更希望華仔可以帶來男、女合唱版：「因為套戲真係好深刻又好好聽，聽親都好似催淚彈。」

林嘉欣最愛〈如果我有事〉，希望劉德華可以帶來男、女合唱版。

古天樂心水歌偏門

另一位女神劉心悠就希望聽到〈忘情水〉，更因而曝露年齡秘密：「記得小學時一返到屋企，就將錄音帶不停聽不停聽。」至於古天樂嘅心水就真係偏門，佢希望華仔唱〈南音〉：「《神鵰俠侶》裡面華哥做咗神鵰大俠之後，其實唱咗首〈南音〉，大家可能無咩印象，但我就好深刻，因為我都做過楊過吖嘛，有親切感。」

劉心悠想聽到〈忘情水〉，更不慎曝露年齡秘密。