陳卓賢包辦曲詞編監唱

MIRROR成員陳卓賢（Ian）在最新歌曲〈地球上的最後一朵花〉中，首次一人分飾五角，一手包辦作曲、填詞、編曲、監製及主唱。製作過程雖然十分辛苦，更一度感到迷失，但看到成品的那份滿足感，令Ian難以用筆墨去形容。

Ian希望透過歌曲喚起大家環保愛地球訊息，真的不要剩下一朵花才學會珍惜不捨。今次他繼續向全能唱作人的方向進發，為新歌一手包辦曲、詞、編、監，他說起這次錄製歌曲的經過：「今次〈地球上的最後一朵花〉錄咗兩個Session，要兼顧好多嘢，除咗前期創作，重有一啲後期嘢，用好多時間同精力，亦因為準備時間唔算好充足，錄完後即時做好多Tuning （調音）嘅工作，喺製作時會有一兩個Moment自己陷入咗迷宮之中，因為自己監製，又要判斷每個Vocal要點樣處理，又要揀Take，再作調整，長期喺錄音室時，會有一兩個短暫Moment迷失方向。」雖然Ian要絞盡腦汁瞓身做歌，但他坦言十分享受整個製作過程。他續道：「一路錄一路跟住揀Take再Edit，但見到首歌一步一步咁出嚟，過程雖然辛苦，但係係幾開心！」

Ian身兼數職，但幸好還有黃兆銘（Nick）參與了編曲的部分，對方彷如成為Ian的定心丸。Ian說：「一開始決定做〈地球上的最後一朵花〉時，心入面已經好明確要搵Nick一齊合作編曲，因為以前聽過好多好鍾意嘅作品，入面有好多好多弦樂，都係出自佢嘅手筆。其實一開始寫好旋律、有個畫面時，就覺得呢隻歌係好需要一啲好好聽嘅弦樂放入歌裡，所以自己就即刻聯絡佢，問佢有冇興趣一齊做呢隻歌。過程中Nick畀咗好多意見，我成日不斷轟炸，日以繼夜問佢意見，但佢依然好樂意逐一解答我所有問佢嘅意見同睇法，所以好多謝佢嘅幫忙。」 （編輯：游子欣）

Ian希望透過新歌〈地球上的最後一朵花〉喚起大家環保、愛地球的訊息。（相關機構圖片）

Ian一手包辦作曲、填詞、編曲、監製及主唱五個角色。（相關機構圖片）

Ian同時請來黃兆銘（Nick）參與了新歌編曲的部分。（相關機構圖片）