有日本媒體爆料，由荒川弘所著嘅人氣漫畫《鋼之鍊金術師》正式宣布於明年推出真人版電影，並確定由山田涼介飾演主角「愛德華艾力克」。雖然人氣漫畫改編電影並唔一定成功，好似最近就有《進擊的巨人》，拍成電影後完全失去漫畫嘅神韻，可以話係失敗之作。不過，當中亦有唔少成功嘅例子，好似早年嘅《死亡筆記》，就獲得唔少粉絲大讚。今次演出主角嘅山田涼介，去年拍攝過改編漫畫嘅真人電影《暗殺教室》，而且大收旺場，都可以話係信心保證。
至於《鋼之鍊金術師》呢部漫畫，當年可以話係風靡一時，故事舞台設定喺一個鍊金術相當發達嘅世界，想讓母親復活嘅主角兄弟，違反禁忌嘗試用鍊金術鍊成人體，結果導致不可挽救嘅後果。而鍊金術嘅基本原則「等價交換」（即一個人能得到回報的價值與其付出的價值相等）亦成為大家嘅口頭禪及潮語。
再睇埋今次嘅演員陣容，除咗山田涼介演出「愛德華艾力克」，仲有本田翼飾演女主角「雲尼諾貝爾」、藤岡靛飾演「馬斯丹上校」、佐藤隆太飾演「馬斯修茲」等。
下載APP