程美段堅拒再合作

（杜汶澤和程美段近日因拖糧事件隔空開火。）

（杜汶澤五度鞠躬向程美段正式道歉。）

曾為無綫節目《美女廚房》擔任美女學徒的程美段，於今年1月為杜汶澤的網上煮食節目拍攝完後，竟延至4月24日才收到應得的9,000元港幣酬勞。遭到拖糧的她即向記者狂呻，此舉惹來杜汶澤不滿，結果兩人於Facebook上隔空開火。杜汶澤明嘲暗寸指程美段根本是博見報，更呼籲同業若聘用對方時要小心；而程美段則公開與製作人員之間的WhatsApp對話錄音，作出反駁。

事件發展多日以來，引來大批網民熱議。最後杜汶澤於他的網台Facebook專頁發表道歉聲明指自己行政失當。直至昨晚（1日），杜汶澤做直播時親自向程美段鞠躬道歉，以表誠意。其老婆田蕊妮亦有到現場支持，更同步用手機睇直播。

杜汶澤指自己由細到大鬧人都非常出色，並且鬧人無數，不過總有鬧錯人的時候：「本人喺度鄭重道歉，我對之前話程美段放料畀傳媒博見報，講聲對唔住；我哋公司嘅人應承咗佢一個禮拜出糧，最後三個月先出，好對唔住；我之前叫大家小心啲呢個人，唔好再用佢，好對唔住；我對之前對佢講嘅所有指控，都講聲對唔住。」他雖然邊道歉邊爆粗，但每道歉一次都有鞠躬示意。

程美段接受對方道歉

事後，程美段亦於社交網回應杜汶澤，強調自己只是堅持自己認為是對的事，同時亦表示接受對方道歉。不過，她講明今後不會再跟對方的網台合作：「好多網民估我哋呢單大龍鳳，最後我同杜生可能係世紀大和解，齊齊再上Late Show Super，呢個說法實在太侮辱我哋雙方。為保我同杜生嘅聲譽，只好厚住面皮單方面咁宣布唔會再同呢個平台合作。」

（編輯：黎永樂 盧妙雯）