日本人真係乜野都鍾意玩VS，就連一代恐怖鬼后《午夜凶鈴》嘅貞子同埋《咒怨》嘅伽椰子，都將會喺大銀幕上面大對決。6月18日先喺日本上映嘅《貞子 vs 伽椰子》，宣傳攻勢一浪接一浪，早前呢兩隻惡靈更加現身北海道札幌巨蛋球場，主持「北海道日本火腿鬥士（Hokkaido Nippon-ham Fighters）」對「東京養樂多燕子（Tokyo Yakult Swallows）」棒球賽事嘅開球禮。
日本職棒一向鍾意搵靚女主持開球儀式，今次搵貞子同埋伽椰子，再加埋伽椰子個乖仔俊雄齊齊主持開球禮，可謂別開生面，大收宣傳之效。
唔好諗住成件事只係玩噱頭，估唔到貞子投球有姿勢有實際，球速重有成96 公里！不過伽椰子都唔弱，一擊即中打出安打，但係就冇力跑疊。好彩有乖仔俊雄接力，睇唔出奀嫋鬼命嘅鬼仔俊雄，跑得咁鬼死快。
睇完呢個咁爆嘅職棒開球禮，遲啲入場睇《貞子 vs 伽椰子》真係唔知當佢鬼片定笑片睇好......
下載APP