氹仔運動場剛剛完成兩場足總盃四強戰,德晉加義和鄒北記齊齊以點球淘汰蒙地卡羅和賓菲加,兩隊將會於下周四上演決賽戲碼。賓菲加和蒙卡將於本周日爭奪季軍。
加義上半場受制於蒙卡全場壓迫,被攻到上氣不接下氣,幸得門將拿迪斯勞今仗有穩建發揮,上半場守和0:0。下半場加義换入巴波沙加強攻力,60分鐘便收到回報,於人群中快腳射入,但臨完場前加義後防睇漏蒙卡的積遜,被他追平。需要進入點球大戰分勝負,最終加義門將拿迪斯勞表現神勇,助以4:2擊敗蒙卡,成功晉級足總盃決賽。
賽前被睇低一線的鄒北記,今仗表發超水準表現,上半場與賓菲加鬥攻,對方多次機會未能換化為入球,下半場隊中靈魂迪亞高著哂火,分別在47和53分鐘攻破賓菲加大門,落後的賓菲加全軍壓上,憑艾美達和哥斯各入一球追成2:2平手。同樣要用點球分勝負,鄒北記最後以4:3淘汰賓菲加,同時也粉碎對手的雙冠美夢。決賽將於下周四晚上7時30分在氹仔運動場上演。