由苗僑偉、林峯同佘詩曼主演嘅劇集《使徒行者》，日前落實將會開拍電影版。劇集監製文偉鴻轉做導演，而王晶就擔任監製。演員方面，佘詩曼繼續演出「釘姐」，不過「爆Seed」就唔會由離開咗TVB嘅林峯演出。此外，電影版會加入古天樂同張家輝兩名全新嘅黑幫人物，而吳鎮宇就飾演與佘詩曼同一戰線嘅警察。
古天樂同張家輝繼《掃毒》後，再次合作新戲。
電影版會延續劇集五個卧底之後，出現第六個卧底，故事主要講黑幫追查佢哋組織內嘅第六個卧底。由古天樂同張家輝扮演販毒集團兩大重臣，一個處事離經叛道不依常規，一個冷酷狡猾心狠手辣。到底邊一個會係臥底？咁就要等套戲上映先知。據了解，電影版將投資8,500萬元，預計下月中開拍，仲會去到巴西等地拍攝外景。
下載APP