港姐謝嘉怡驚聖誕冇人約

今年是謝嘉怡首次在港度聖誕和除夕，她表示很開心。(謝嘉怡IG截圖)

對於肥媽喪偶，世姪女謝嘉怡表示私下有慰問對方。(謝嘉怡IG截圖)

應屆港姐冠軍謝嘉怡（Lisa）與陳家樂一齊出席公開活動，即將首次在香港度過聖誕和除夕的她表示很開心，預算跟嫲嫲、姑媽及表妹一起食飯歡度佳節。在接受訪問時，Lisa透露在蘇格蘭因曾任護士，試過在手術室過聖誕，但許多時都有假放，可以跟隨當地習俗，早餐吃雪糕，中午會留在家中看與聖誕有關的電影和拆禮物，晚上就會和家人一齊食飯同歡。問到為何不和男友過？Lisa笑言：「嗰邊過聖誕就好似中國過新年咁，每年都同屋企人過，仲好呀！」她自爆已經單身約三、四年：「之前覺得讀書緊要啲。」問到現在有沒有追求者，Lisa坦言沒有：「可能係我廣東話唔好，又或者係自己敏感度唔高，察覺唔到。」，更大呻聖誕應該要單身過。Lisa身在蘇格蘭的父母於明年1月左右回港，Lisa說：「依家蘇格蘭都算安全，未係完全Lockdown，但夜晚6點後就要返屋企。」問到會否擔心疫情影響家人返港，她表示：「佢哋飛到，飛之前會先做測試，返到嚟再隔離14日。」講到肥媽喪偶，作為世姪女的Lisa表示私下都有慰問肥媽：「會畀多啲愛佢。之前睇肥媽條自拍片睇到喊，希望佢快啲平伏心情。」她透露都會出席喪禮。 編輯:莫韻