黎明邀請林海峰（左）任演唱會嘉賓。（資料圖片）
黎明今次演唱會唱歌之餘又玩棟篤笑。（資料圖片）
天王黎明（Leon）昨晚（10日）舉行一連九場的香港紅館演唱會。林海峰（Jan）擔任首場表演嘉賓，更大爆Leon全新金句「噏 To U」，全場爆笑。Leon介紹嘉賓出場亦與眾不同，他說：「『嘉賓』通常係『請』嘅，升上嚟嗰啲叫『等嘉賓』，我示範一次咩叫『請嘉賓』，我落去。」語畢Leon降到台底，親自陪Jan上台。Jan坦言與Leon私下不相熟，他說：「記唔記得我哋通電話，我唔知同你講乜，因為其實我同Leon係唔熟，我話：『Leon，噏乜嘢？』Leon同我講：『Jan，噏咩？Up To You啦！』佢係九秒九彈嚟！『噏咩呀？Up To You！』呢句嘢，我諗吓都真係幾好用㗎喎！」
姜濤分享了黎明和林海峰唱自己歌的片段。（姜濤IG截圖）
他立即以Leon全新「金句」套用於日常生活中，說：「例如情侶，另一半問你：『噏咩？』咁你點答？『Up To You啦！』如果同人嗌霎，車厘子你嘅時候，你話：『你噏咩呀？』『Up To You啦！』你即刻收聲。即係呢一個回應，既賓賓有禮、大方得體得嚟，有啲浪漫不羈，同埋有啲挑釁性。直情有啲似小學嗰啲『反彈閘住』。咁佢話『Up To Me』咁我話OK 返去諗吓啦，到時綵排再話俾你聽點樣啦！」然後林海峰突然爆出Leon另一金句：「綵排綵排，都不及天意安排」全場立即給予掌聲！而兩人之後更合唱人氣王姜濤的〈蒙著嘴說愛你〉，觀眾不停揮動熒光棒，氣氛高漲。（編輯：黎永樂）
下載APP