杜俊瑋新歌《飛天》記錄出道多年來的唱歌生涯。（資料圖片）
杜俊瑋（中）與兩位MV製作公司創辦人一起遠赴青海拍攝新歌MV。（資料圖片）
杜俊瑋新歌歌詞十分勵志，亦是他在演藝路上的心聲。（資料圖片）
本澳跳唱歌手杜俊瑋（Filipe）從少年時在加拿大參加新秀，回到港澳發展再到台灣出戰超級偶像，直到2019年才正式推出首張個人迷你專輯《H.E.R.O.》，不經不覺，Filipe走在音樂路上已有20個年頭。去年10月，Filipe創作了他的新歌《飛天》，寫歌時沒有為新歌定下風格，歌詞也交由填詞的李峻一任對方發揮，再經過福島章嗣的編曲，結果就完成了一首紀念他出道多年以來經歷的歌曲，並為新歌去到青海進行MV拍攝。
提到新歌誕生的由來，Filipe娓娓道來：「因為有兩位朋友Jarvis同埋阿雀，佢哋係Motive Move Production創辦人，三年前開設咗呢間公司，第一個MV就同我拍嘅，拍咗《 Pull the Trigger 》同《 Boooom 》 MV，所以佢哋上年就同我講想同我拍第三個MV，不過我又冇歌喎，但我又唔想搵啲舊歌拍，我就話不如我寫首新歌去拍啦。」 Filipe又指原來今年也是自己在澳門出道20周年，便決定藉以新歌去記錄多年來的唱歌生涯。
《飛天》的歌詞十分勵志，亦是Filipe在演藝路上的心聲。「出道咗20年又唔算係起跌，應該係話經歷！你經歷到幾多嘢，學到幾多嘢，領會到幾多嘢，我唔會用紅唔紅呢樣嘢來定我係起係跌，有好多時候都要去深造同學習，你先至可以加強自己！」歌曲亦有出戰今屆的澳廣視《新聽力》，雖然未能獲得任何獎項，但有份參與盛事的Filipe都很開心見到本地有更多好的Artist和音樂創作人出現：「今年我覺得好好，個個參加者嘅音樂作品都好有水準，Band都多咗，都係我好開心見到嘅嘢！」
杜俊瑋形容今次拍攝MV之旅要上山又要下海。（資料圖片）
而Filipe與製作團隊更為《飛天》MV遠赴內地青海拍攝，他形容此行上山又下海：「上咗海拔4,000米高嘅雪山，用咗九日，行程都行咗3,600公里，基本上我哋三個人搞掂，其實有個小插曲，我哋上咗高山都有少少反應，可能氣薄咗，不過過咗幾個鐘都適應返仲可以拍到跑步嘅鏡頭，一切都好順利！」由於澳門近日出現疫情，原定舉行的MV發布音樂會被逼取消，改為後晚（7日）8時網上首播，歌迷記得留意！（編輯：黎永樂）
下載APP