美國總統大選於澳門時間昨晚7時正式投票,希拉莉同特朗普邊個會成功入主白宮,成為世界焦點。擁有美國國籍嘅吳彥祖,日前於Instagram展示投票單呼籲美國公民投票,不少網民猜測佢會投特朗普,但吳彥祖就表示將票投給希拉莉,佢話:「沒關係,我是投給希拉莉的,我非常驚訝這麼多中國人支持特朗普,特朗普討厭中國,他甚至想要對中國做出貿易限制!」
吳彥祖支持希拉莉嘅消息傳開後,惹嚟大批內地網民不滿,紛紛於Instagram及微博留言炮轟,更有唔少支持特朗普嘅人揚言要抵制佢。面對網民嘅謾罵,吳彥祖淡定回應:「你們有權表達自己的政治觀點,但你們這麼恨我,為甚麼還要來這裡留言?」吳彥祖話自己展示投票單,唔係為邊個拉票,係鼓勵大家投票,實現民主嘅意義。