已故一代巨星鄧麗君,1995年逝世後,長眠於台灣金寶山「筠園」,每年都有上萬粉絲前往悼念。近日,鄧麗君香港基金會「君迷會」,投訴某位粉絲多次於墓碑上用膠布貼上鄧麗君嘅照片,導致碑石受到破壞,斥責該民粉絲屢勸不改嘅行為十分離譜,而且對偶像亦極不尊重。對此,身處國外嘅鄧麗君三哥鄧長富回應表示:「絕不允許破壞,近日會請基金會人員了解狀況處理。」
據「君迷會」工作人員透露:「自1999年開始有歌迷喺碑石上貼照片,但當時捉唔到破壞嘅人,呢件事持續多年依然未改善,碑石好早已經失去原來嘅面貌。」
今年8月,「君迷會」成員去台灣悼念,發現墓碑膠布痕跡已被清理乾淨重新打磨,恢復咗原有樣貌,但結果喺9月,發現碑石又被貼上照片,有歌迷睇唔過眼撕甩照片,期後一名王姓粉絲喺Facebook留言不滿貼相畀人撕掉,貼照元兇終於現形。事後,唔少網民都批評呢名粉絲冇公德心,更有人留言表示:「別當自家東西好嗎, 屢勸不聽真的是有病。」