早前，香港超級富豪劉鑾雄（大劉）高調同舊愛呂麗君斷絕關係，其後火速同另一女友甘比入紙結婚。甘比坐正做劉太後，惹爭產疑雲的呂麗君態度軟化，向大劉送上祝福。噚日，有報道話呂麗君只係「掛名」富婆，並唔係大劉所指有20億身家，又話大劉送畀呂麗君嘅Hermès名貴手袋，喺公開場合「露面」後，大劉全部要收回。
對此，大劉接受媒體訪問反擊，佢話贈予嘅物品全部有單有據，怒轟呂麗君混淆視聽。大劉話除咗200個Hermès名貴手袋，仲送過唔少鑽石珠寶畀呂麗君，包括一粒5,000萬（港幣，下同）黃鑽、一粒4,000萬粉紅鑽同一粒幾千萬紅寶石及珍珠鏈等，珠寶市價約兩至三億，全部送出去都冇收番。
最後，大劉出示一份2013年嘅法律文件，文件中呂麗君簽收咗大劉餽贈嘅八件名貴珠寶，並詳列珠寶卡數、購入地方、購入價，且附有珠寶鑑證報告及當時購買嘅支票紀錄。大劉話要提證篤爆呂麗君係說謊的女人，佢話：「最憎俾人屈，我而家送畀佢嘅珠寶列晒清單出嚟！當年送嘅時候值億幾，而家已升值過兩億，另外送嘅現金、加埋其他嘢超過20億！如果有人要繼續搞小動作，我仲有好多證據可以Show出嚟！」
下載APP