潘紹聰爆電影版由郭羨妮擔演

由「鬼王」潘紹聰領軍的「恐怖在線」15周年舞台劇《死鬼老婆》×「恐怖在線」現場版早前已在香港藝術中心壽臣劇院展開演出。連日來有不少圈中人捧場及擔任嘉賓，而第10場有郭羨妮、第12場則有黃夏蕙任嘉賓。

潘紹聰曾透露幾年前計劃將《死》劇開拍電影版，但因疫情而擱置。原來電影版的角色早已屬意郭羨妮演出，兩人在第10場的分享會上談及此事。郭羨妮表示正等潘Sir拍板，她說︰「搵我梗係做，不過大家睇咗呢個先，真係好值得入場睇。」談到今次入場觀後感，她說︰「我從來未睇過靈異舞台劇，感覺好似入咗鬼屋咁，驚嚇位真係好驚，直頭想講粗口。」

郭羨妮表示她自小喜歡聽鬼故，在台上她分享被鬼壓經歷，她指有一次因太累，下午在家睡覺時竟然遇「鹹濕鬼」，她說︰「嗰日我真係好攰，瞓瞓下feel到有啲嘢，聽到好嘈聲音，但聽唔明講乜，感覺有嘢好似從下摸上來，重覺得有嘢鍚埋嚟，（潘問︰男鬼？）我唔知，心入面咩都唸晒，掙扎咗一陣先至郁得返。自從嗰次之後，我一個人就唔敢熄燈瞓覺。」

至於第12場嘉賓黃夏蕙，她盛裝打扮到場，吸引不少觀眾找她合照，入場時獲全場觀眾報以歡呼聲。談到觀後感，黃夏蕙表示︰「好好笑，音響又好，好感人，嗰下忽然間梗係有嚇親，嚇到跳起㖭。」分享靈異經歷時，她回想多年前，帶隊與已故鄧碧雲、梁醒波等一行60多人到海外登台做大戲。當他們入住一間酒店時，她說︰「其中一間房，原本酒店唔租，但我哋唔夠房，後來有兩個女仔入住，嗰晚佢哋感覺有嘢打佢哋，我哋過去睇，大家坐喺房內，就見到幅牆滲出血水，愈滲愈多，突然嘩一聲，感覺有啲嘢好似走咗，後來先知間房曾經有人死咗。」 （編輯：游子欣）

（左起）潘紹聰大爆《死鬼老婆》的電影版一早屬意由郭羨妮擔演。（相關機構圖片）

潘紹聰（左一）率領一眾舞台劇演員與嘉賓郭羨妮（左三）合照。（相關機構圖片）

（左起）潘紹聰與第12場的嘉賓黃夏蕙在台上合照。（相關機構圖片）

鄧兆尊（右）亦在其他場次擔任嘉賓。（相關機構圖片）