鄭嘉穎喺澳門拍攝新戲《九龍不敗》時,被邀請返治安警察局協助調查,獲保釋後,鄭嘉穎凌晨即刻趕返香港。事後,鄭嘉穎同導演陳果拍片為事件解畫,陳果話:「我哋喺澳門陸軍俱樂部上邊嘅博物館,因為個地方好靚好有澳門感覺,加埋想拍澳門CID出發做嘢嘅場面,啲器材就擺喺車度拍,點知就觸及咗法律禁區,全部請晒返去接受調查,情況係正常,我哋有錯,嘉穎陪我哋去就好無辜,而家已經落晒口供。」
鄭嘉穎話入咗治安警察局時電話畀人收晒,佢話:「當地警察好有禮貌,我哋食咗一餐差館飯,佢哋推介嘅咖喱雞飯幾好食。」最後,鄭嘉穎強調話事件已經圓滿結束,希望之後喺澳門嘅拍攝會順利。