李克勤係圈中出名嘅曼聯粉絲,日前適逢曼聯喺英格蘭足總盃大戰布力般流浪嘅大日子,結果曼聯不負眾望以2:1擊敗對手!身為忠實粉絲嘅李克勤當然要坐定定睇波,佢仲喺Facebook貼出直播賽事圖片同粉絲分享,仲話:「真魔粉!誰跟我一樣?」事關呢場賽事香港只有樂視收費平台先可以睇到,而李克勤貼出嘅賽事圖片,好明顯見到佢睇嘅唔係樂視,而係外國嘅串流網。唔少網民都狠批李克勤公然睇盜版,更有人留言表示:「真魔粉身體力行支持盜版!」
事後,李克勤喺Facebook發表長文回應事件,佢話:「一覺醒來,發覺原來很多網民對於我昨晚上網睇波有意見,我想講的是,我昨晚不在香港,所以根本冇可能睇到香港樂視台。」李克勤話自己身處嘅酒店搵唔到足球台,只能喺網上搵一個唔知咩語言嘅網站睇賽事:「明明開咗波又睇不到,那種身痕像俾蟻咬的感覺真的非筆墨所能形容,如有什麼不當希望大家體諒。」