人稱「旦哥」嘅著名主持人鄭丹瑞,近年最為人熟悉嘅節目應該係TVB嘅《你健康嗎?》,呢系列一再添食到第四輯。不過,旦哥去年8月約滿TVB後,忙於拍電影同音樂劇。正當觀眾以為冇機會再喺TVB見到旦哥時,原來佢又有新節目要出街。今次旦哥將同樂壇天后鄭秀文(Sammi)合作訪談節目《心情約會》,一連六集訪問過去曾患過情緒病嘅藝人。
早前,旦哥於微博貼出同Sammi嘅合照漏口風,佢話:「終於有機會同Sammi 合作一個非常有意義的節目,所以笑到見牙唔見眼!」其實Sammi過往都有喺TVB主持節目,不過就以音樂嘅類型居多。今次相隔四年再度主持訪談節目,仲係關於情緒病嘅話題,相信Sammi會再講到佢過去患抑鬱症嘅心路歷程,以親身經歷鼓勵情緒病人走出陰霾。