向來低調鮮有出席公開場合嘅黎明(Leon),近月不時喺網上為本月底舉行嘅4D演唱會《黎明Leon 30th Anniversary Random Love Songs 4D in live2016》宣傳,而宣傳片嘅點擊率仲非常高!對此,Leon接受專訪時就話︰「我開始去玩Facebook,係因為同事一句:再唔玩就落棺材!」Leon明白好多事如果唔去嘗試創新,就會係死路一條。問到離婚之後佢感情生活點樣?佢就即時拋金句:「拍拖同撞鬼一樣,都好講緣分!」對於被冠上金句王稱號,Leon淡淡然說:「我講金句其實冇特別,因為我喺內地長大,所以想法同表達方式有啲不同。」