韓國天團Big Bang隊長G-Dragon喺亞洲人氣爆登,去到邊都一定被大批粉絲包圍,不過佢就好似唔多怕,仲特登公開行程話自己會飛北京,結果引嚟一大班粉絲喺機場接機,場面混亂!
當日G-Dragon落機步出北京機場禁區,即被多名粉絲瘋狂追拍,而其中一名女粉絲喺混亂中被保安推落地,但G-Dragon就直行直過無理到。不過,亦有粉絲為G-Dragon抱不平,指嗰位女粉絲喺超近距離喪拍G-Dragon,係人都會嬲,仲話係因為佢行為太過分,保安先會出手護駕,到底邊方面先係真?有圖有真相,大家自己判斷囉!