香港電視(港視)主席王維基喺今日招開記者會,忽然高調宣布參選今屆香港9月舉行嘅立法會選舉。有啲記憶嘅朋友都知道,王維基因為「一藍子」(又或者係「一男子」)因素,令到佢旗下公司香港電視攞唔到免費電視牌照,最後要搞到轉型做網購,真係一波三折。問到佢係唔係因為攞唔到牌,所以先參選?王維基就即時解畫:「參選同港視牌照申請無關,但我明白世界變咗,不獲發牌可以一個原因都無。」佢仲講到會向中央表明「我哋要換咗個特首,想要一個誠實嘅特首」。
王維基今次參選嘅消息,由商台首席智囊陳志雲喺早上嘅電台節目《在晴朗的一天出發》公開,其後王維基就喺中午開記者會,確認參選一事。至於大家最擔心嘅問題:到底王維基企邊面?佢就話自己係「中間偏黃」,即係贊成一人一票無篩選選特首,但反對港獨同碇磚。