人稱「大劉」嘅香港富商劉鑾雄，突然喺香港七份報章頭版刊登聲明，高調宣布同相處多年嘅女友呂麗君斷絕關係，成為全城熱話。隨後，大劉罕有接受報章訪問，對於有傳佢被迫發表聲明，大劉話：「你睇我個樣似唔似畀人禁錮？公司好多同事都直接搵到我。」
大劉除咗喺報章上狂數呂麗君收過自己20億港幣資產，更鬧爆對方永遠都貪得無厭，佢話：「就算畀多200億呂麗君，佢都會為一蚊出賣我，你就算畀幾多錢都冇用，佢永遠貪得無厭。」不過，大劉就對另一位紅顏知己甘比讚不絕口，佢話：「甘比冇問我拎一毫子，呢幾年我病，都係佢照顧我同仔女。」
對於大劉嘅種種指控，呂麗君亦發表聲明公開回應，佢話見到大劉可以喺媒體上侃侃而談，自己同仔女都好安心，仲話已經聽到大劉嘅各種不滿，佢話：「對不起，請不要再生氣。不要死心，只要你高興，為了你我會改的。你把一肚子的氣罵出來就好了，不要屈在心中。謝謝你過往對我跟孩子的照顧，我們對你只有感恩和愛，其他什麼都不重要，只要最後一家和睦。」
下載APP