人稱「堂哥」的貨車司機入行已經超過30年，早年曾在碼頭開車搬貨，亦試過「打自己工」開車送貨，他憶述以前「錢易搵啲」，後生果時只要肯捱就得，試過收150蚊一個人開車連送貨搬成部鋼琴上唐樓。供書教學、總算捱大仔女的堂哥，即使現時仔女都已出身搵到份文職，自己亦年屆60退休年齡，身體亦因後生搏到盡現時出現尿酸等毛病，但堂哥仍未言退，現時在一家石油氣公司返朝九晚六，任職全職司機。堂哥坦言：「無他，希望可以經濟上再幫下仔女，做得就繼續做。」他無奈地稱，雖然仔女搵兩萬蚊個月，但近十幾年樓價狂升，莫講話買樓，打成世工可能車位都未必買得起。堂哥又慶幸現時得到老闆賞識，對佢年資經驗同「手車」（駕駛技術）認可，所以已經出到比一般市面上高嘅萬八蚊月薪開車送貨（石油氣），雖然好多時自己都要落手落腳幫手上落貨，但公司都安排一名跟車搬貨勞工，自己就主要負責應付路面情況及送貨到達地點。
「爛身爛世」年青人唔肯入行
曾開過賭場車、的士的堂哥，即將退休之際仍選擇開送貨車，他坦言喜歡當中「冇咁多規定束縛」，快手快腳送貨到目的地又可以有時間同其他人「打下牙骹」。但他稱，由於送貨司機多數給人印象都爛身爛世，搬貨又辛苦，以自己為例，除每日要聞石油氣等刺激性氣味，搬重貨時亦經常損手爛腳，「後生仔有得揀都揀文職或者賭場啦，起碼着得靚先，邊似我哋」。堂哥透露，現時已很少人入行，最後生的都30幾、40歲。
最辛苦直踩朝九晚十一 日送百罐氣
堂哥稱現時一般開車送貨時間為朝九晚六，中午送完手頭訂單後有一小時午飯時間，但最長OT試過直踩到晚上11點。他指以天氣轉凍為例，居民對石油氣的需求大增，而且大部份都是唐樓居民，因為一般大型屋苑大廈已改用中央電力或氣體供應。堂哥試過一晚接訂單送貨，做到11點才停手，天氣冷的時候平均一日送100罐石油氣。「你知啦，澳門返工放工時間啲交通實大塞車，加上好多人放咗工六、七點先叫石油氣，我哋都會送埋先收工」。訪問當日，有尿酸同腳痛的堂哥聽醫生建議多運動和節食，原本叫了一個雞扒包做午餐，誰不知突然電話響起又接到訂單，堂哥便拿拿林急急腳走人，打包個雞扒包話送完貨有時間再食。問堂哥辛苦嗎？「唔怕，為仔女冇計啦！」
下載APP