有留意上期的米芝蓮摘星餐廳推介，應該不難發現星級餐廳雖然吸引，不過價錢就讓人退避三舍。其實米芝蓮指南中還有一個街頭小吃推介清單，當中介紹的食店就親民得多，亦多數位於社區的街頭巷尾之中，好味之餘又夠貼地，本期更會同場加映編輯部推介之滄海遺珠食店，絕不可錯過！
老號竹昇麵 街坊食足90年 梁慶記
位於十月初五日街蛋巷的「梁慶記」，是澳門第一代竹昇麵家，今年首次入選米芝蓮街頭小吃名單。
梁慶記的鐵皮檔已有90年歷史，附近街坊可以說是由細食到大，而埋首在爐灶煮麵的老闆娘亦已是第三代傳人。其招牌全蛋竹昇麵每日鮮製，由師傅用傳統竹昇方法製成，麵質爽滑有蛋香，鹼水味極少，煮好放入豬骨湯頭已很好食。雲吞亦非常出色，豬肉和蝦比例剛好，大小適中，一口一粒，皮薄餡靚，可謂一試愛上。價錢更加無可挑剔，一碗淨雲吞只需23元，其他麵食亦基本同價，真心夠貼地！
皮薄餡靚的淨雲吞（MOP 23），一啖一粒，鮮味又有肉香。
全餐麵（MOP 80）已是全店最貴餐點，有齊鴨紅、豬手、雲吞和大腸等多種材料，可試勻店鋪的食材。
牛腩拼豉油鳳爪麵（MOP 30）牛腩軟腍，腩汁極香，雞腳用電飯煲炆煮，同樣軟腍入味。
豬手大腸河粉（MOP 30）豬手雖不大件但燜得入味，大腸爽脆不怕有膻味，河粉爽滑。
每日製作的全蛋竹昇麵爽滑有蛋香，鹼水味極少。
每天埋首爐灶煮麵的老闆娘已是第三代傳人。
平民美食 街頭米芝蓮點心檔昌盛餅店
隱身於義字街行人專用區眾多檔口中的「昌盛餅店」，雖然是街邊檔，但行過路過一定不會錯過，皆因檔攤堆著多個大蒸籠，遠處已可見其蒸氣瀰漫，飄出陣陣香味。
這間老字號點心包點外賣店，自2016年起已在米芝蓮街頭小吃推介中榜上有名，其點心大大件兼高質，相比一般茶樓出品有過之而無不及，饅頭、豬肉包和叉燒包件件都比手掌大，包身鬆軟，內餡足料滋味，還有鹹肉粽、燒賣、粉菓、馬拉糕和糯米糍等十多款咸、甜點心，全部無間斷即製即蒸即賣，新鮮熱辣，價錢更是親民，基本十元有找。
叉燒包（MOP 7）即製即蒸新鮮熱辣、份量大得驚人。
外皮煙韌的粉菓（MOP 7）內有豬肉、蘿蔔絲和粉葛，又香又有口感。
燒賣（MOP 3.5/ 粒）食落有粒粒豬肉口感、亦有蝦肉，足料！
昌盛亦有售紙包蛋糕這類西式糕點，食落同樣鬆軟。
昌盛一開檔便全日無間斷蒸製包點，顧店的阿姨忙個不停。
老街小店 手工豆腐擔大旗榮記荳腐麵食
越簡單的美食越難做出水準，一碗豆腐麵看似簡單，卻已傾注諸多心思和功夫。
位於關前老街附近的「榮記荳腐麵食」，由車仔檔起家到自設店鋪，一碗豆腐麵賣足70年。其自家製豆腐每朝早6點開始全人手製作，比起坊間機製的更為綿滑細緻，入口富濃郁豆香，無論放湯或撈麵都同樣美味。看似平平無奇的豆腐撈麵，嫩滑豆腐與爽彈的蛋麵，配上豬油渣甚是惹味，令人有一吃再吃的衝動。此外，其新鮮製作的豆漿還有加上淡奶同吃的豆腐花，香甜地道，實不可錯過。
豆腐撈麵（MOP 18.5）內的豆腐嫩滑而又扎實，配以豬油渣撈麵，濃淡相宜。
滑不溜口的熱豆腐花（MOP 8/ 細）加上淡奶，豆味與奶香融合好滋味。
話明車仔麵檔，又點少得這種花心鬼最愛的全餐餸（MOP 95/ 中）！多種配料中尤以豬皮最佳，索汁又不油膩。
榮記的豆腐每朝人手新鮮製作，豆香濃郁又綿滑。
小店中店主、伙記和街坊，不分你我吹水打牙骹。
日本職人 深宵小巷關東煮關東煮手作坊
澳門渡船街的小巷中，有間200呎不到的日式小食店「關東煮手作坊」，至凌晨時份仍大排長龍，千里迢迢到澳門開店的老闆真也，是土生土長大阪人，這裡賣的是正宗日本風味的關東煮。
雖沒米芝蓮光環，但此店是編輯心目中的滄海遺珠之一，在老闆身上可以體現日本的「職人魂」，決定在澳門賣關東煮前，他曾走遍日本、台灣及澳門，試過無數口味，調配出一款他認為是最好味的湯底——以昆布、雞骨和日本豉油熬16小時，不加味精，才弄出清而不淡的湯頭。食材方面都堅持由日本直送到澳，連醬料都是自家調製。其必食的大根，熬得入味軟腍，充滿蘿蔔清香，甜度極高，越簡單越見功夫。
店中的關東煮物款式頗多，皆以自家熬製湯底浸煮。
必食鎮店名物大根，軟腍入味，又甜又清。
各款材料任君選擇，其中芝士麻糬福袋、竹輪和麵包超人湯煮蛋等都是必食。
店內掛上的菜單由辻真也太太親筆所寫。
老闆辻真也是土生土長大阪人，對關東煮的質素要求很高。
地膽必食 街坊價蟹黃撈麵新龍記美食
另一間滄海遺珠食店，要數位於紅街市附近的「新龍記美食」，開業十多年，由於位處社區，鄰近本就沒甚麼景點，所以來光顧的大多是街坊地膽。
店內一副平常茶餐廳格局，營業時間朝7晚10，不過長期都坐滿食客，為的就是一嚐餐廳最出名的蟹黃撈麵，其蟹黃色澤啡黃，味道濃香撲鼻，與麵撈勻後，蟹黃滲出黃油，啖啖甘香。如果加上其另一名物香煎墨魚餅，香口彈牙又鮮味，配搭更是一流。其他食物如濕炒蠔仔麵、煎鯪魚餅等亦深受街坊歡迎。重點是街坊價格，性價比極高！
煎鯪魚餅（MOP 50）口感彈牙不死實，煎得香口。
秘製辣魚包（MOP 20）估計辣魚與咖哩一同炒香過，再製後成了辣魚醬，味道更加辛辣。
蝦籽雞肉餃撈麵（MOP 45）水餃超大隻，用料足，配上蝦籽更鮮味。
蟹黃墨魚餅撈麵（MOP 50）香口彈牙墨魚餅加上甘香蟹黃，可謂是最強配搭。
新龍記開業十年仍然時常滿座。
下載APP