生蠔海鮮雞煲 MOP 398 一個套餐有齊雞煲、生蠔、沙白、生菜，份量超足，性價比一流！
龍骨雞鮑翅火鍋 MOP 588 除了超抵食雞煲套餐，想食得更豪華，識揀一定揀龍骨雞鮑翅火鍋。
重慶微辣螄蚶 MOP 78 螄蚶食落超新鮮，再配上微辣調味，做前菜開胃一流！
鹽燒海螺 MOP 158 海螺隻隻飽滿，再用上鹽燒的製法，簡單調味已能帶出鮮味。
泰式燒烏頭 MOP 98 一上枱就聞到香濃蒜味，魚肉肉質扎實又香脆，再點上秘製醬汁，一人半條無難度。
留在家中都想食得豐富是件難事？絕對不是！近期受疫情影響，不少食店都紛紛提供外賣服務，想食到外賣和堂食都一樣出色優秀的美食，今期一於為大家介紹澳門街的超實力煲物，無論是惹味雞煲或是生猛海鮮煲，在留家都能有熱辣辣的高質煲物直送到家，又可以少一個出街食飯的理由啦！（文：馬曉珠、梁嘉慧 圖：李浩遠、阮漢賢）
嫩雞煲任君選擇 秘製湯汁食極唔鹹
民以食為天，識食一定是跟著一班街坊搵食！在高士德俾利喇街的「張記粥麵」，開店14年以來一向受不少街坊捧場，雖然招牌上寫著粥麵兩字，但其實店裡最主打的卻是足料雞煲，僅僅是雞煲的款式已超過十款，「龍蝦雞煲」、「鮑魚雞煲」、「椰子雞煲」、「香辣雞煲」等任君選擇，湯汁濃郁的鮮嫩雞煲再搭配各款新鮮食材，清空完雞肉後更可以將湯汁變作打邊爐湯底，再落入火鍋料，惹味過人。店裡的雞煲必須要大讚的，就是不會愈食愈鹹，而之所以能夠成功消除雞煲一向的「弊病」，全靠店裡團隊經過多年的研究和不斷改善，將湯汁的調味較至平衡，香濃惹味之餘更令人一食停不了！
在等待雞煲上枱之前，店裡的其他小炒、冰鎮系列一樣令人回味，「重慶微辣螄蚶」、「鹽燒海螺」、「泰式燒烏頭」等，搭配冰凍啤酒更是一絕。而平時一到晚餐就會立刻滿坐的這裡，早前在疫情影響下雖然要暫停堂食，但為滿足一班食客，店裡就開始提供煲類外賣服務，即使轉為外賣形式都毫不馬虎，除了使用外賣平台，為保持食物質素，更有自家車手同步直送外賣，在限定時間內為客人送上新鮮熱辣的煲物小炒，因此疫情期間更成為不少人的煲物必食，想食最好要提前一日下單！
四人海鮮套餐 MOP 1,599 包含波士頓龍蝦、 綠翡翠鮑魚、美國桶蠔等九款海鮮，上枱全部仲好生猛，絕對食得過癮！
原隻波士頓龍蝦，畀足兩隻你。
龍蝦剌身 師傳將龍蝦切到超薄片。
花竹蝦一碟有十隻，一隻手掌般大。
生猛特別海產 波士頓龍蝦打孖上
鍾情海鮮的朋友仔，若想來返轉海鮮大雜燴？位於下環街的「兄弟煲」必定啱你心水，雖然地點較隱蔽，但勝在海鮮品種夠特別夠生猛。全因老闆的家族海產生意，自家擁有超大養殖缸，每日新鮮直送店內，老闆勞先生說道：「希望可以等客人食到最新鮮嘅食材。」年紀輕輕的他憑著家族生意優勢，加上一股創業堅持，與哥哥一起白手興家打出名堂，這亦是店名「兄弟煲」的構思。開業不夠半年，已擁有一班熟客支持，來到這裡除了可在懷舊復古的環境下邊吃邊打卡外，更配合經典粵語歌曲，氣氛正爆。
店內食物高質，就連外賣亦保持水準，就如「四人海鮮套餐」，重本畀足波士頓龍蝦、綠翡翠鮑魚、美國桶蠔等，聽說叫外賣仲抵過堂食，老闆說：「雖然係四人餐，但一定多過四人份，包食得飽。」至於每款海產在出貨前均由師傅處理好，讓顧客一打開盒即可享用。另外，套餐亦可加購升級，讓你一同品嚐店內的「手打魚蝦丸」及「梅花肉」等，而重頭戲當然還包括自家製的火鍋湯底，有鮮甜魚湯，香濃麻辣湯，蕃茄湯及養生雜菌湯，足料之餘更滿足不同客人口味需求。
下載APP