午夜時分，飢餓襲來，踢拖走在寧靜的街道上尋找美食，雖然夜已深，但是澳門街不會令人失望。新橋區是宵夜福地，在這個轉角或那個路邊，話唔埋就有風靡本地人的地道美食。麵食？燒烤？牛雜？雖不及珍饈百味，倒也自成一格。食宵夜多數不是圖個「飽」字，淺嘗即止，讓這個夜晚也多了一點「滋味」。
飽滿五蝦雲吞
講到渡船臺「文記」路邊檔，當然要推介其「擁有五隻蝦」嘅雲吞，喺澳門宵夜界論得上「有排名」。雖然小小路邊檔、寥寥三張檯，但食物一點都不含糊，人氣雲吞內包入四至五隻河蝦仁，十分爽脆，全無摻入豬肉或其他配料，皮薄纖細，外觀十分飽滿；雲吞用清湯滾熟無額外調味，鮮味突出。老闆順勢推介冬菇，冬菇有何特別？咬落去，大而厚實的冬菇，口感綿軟而紮實，令人喜出望外。其他菜品如魷魚翼，也是爽嫩可口；鳳爪骨皮分離，很入味；柱侯牛坑腩也是毫不遜色。?
淨雲吞MOP 34咬開雲吞，驚喜萬分，四五隻蝦仁，滿足眾人。
冬菇牛腩河粉MOP 34乾菇類最怕有陣「噏味」，但係「文記」的冬菇烹調處理得好，入味又唔怕「實心」。
「文記」老闆正忙於為勞碌的城市夜歸人炮製美食。
路邊的火光熊熊
坐落「文記」對面有「強記」，其火光熊熊是「鑊氣」的最佳證明。經營45年的「強記」，最受歡迎是乾炒牛河，牛河度度都有得食，究其關鍵是在於牛肉。牛肉炒得鑊氣十足、出奇地嫩口，河粉上色均勻，吃罷碟底無油，老闆娘功底可見一斑。粉腸肉絲炒麵也顯細心，粉腸清洗乾淨無異味，麵炒得夠乾身，食落香口。菜單上的「大紅寶石」令人不解，原來是「豬紅」！豬紅結實而不鬆散，沾以加入指天椒、辣椒粉炒過的醬油，別有風味。溫馨提示，辣椒醬油十分強勁，不能吃辣者不要輕試。
乾炒牛河MOP 34牛河炒得香氣十足，牛肉滑嫩，河粉味道均勻，屬牛河中的上品。（李國星攝）
大紅寶石MOP 24「寶石」原來係指豬紅，豬紅口感彈牙，蘸一下辣椒豉油，認真一流。
老闆娘雙「鏟」齊下，拋起熊熊火光，鑊氣十足。
實而不華燒烤
這間位於柯利維喇街、看起來樸實的燒烤店，卻有著與外觀大相徑庭的名字：「華麗燒烤」，仍堅持使用炭火。燒烤火候十足，食起嚟有隱約而不突兀的炭香，非普通電爐所能比擬。主力串燒是雞髀、雞翼、雞翼尖和雞柳，以及熱銷「雞皮串燒」。雞皮於火光中顯得晶瑩通透，燒前已用刀刮去脂肪，口感彈牙軟糯而沒肥膩感，認真驚喜。據老闆球哥透露，醃料混合了十數種材料，包括五香粉、沙薑粉等，更有花旗參蜜！而雞髀、雞翼等同樣有唔少捧場客。
串燒亦少不了魚片、芝士腸等邪惡小食，叫人垂涎欲滴。
燒雞翼MOP 14燒雞髀MOP 23「燒雞翼， 我自細鍾意食……」燒雞翼及雞髀有淡淡炭火香味，食客幾乎都人手一隻。
老闆球哥十年如一日，每日為食客醃製和烤製串燒，賣嘅唔只係味道，更有人情味。
迷人汁底牛雜王
澳門嘅牛雜檔遍地開花，論獨領風騷，不得不提永樂戲院旁嘅「前噴水池牛雜」，一直人龍不斷。此店的牛雜特別在於汁底，和一般柱侯或咖喱汁不同，入口略有甜味，鮮香濃郁，感覺有花椒、八角氣味。牛雜有草肚、牛筋、牛蒡和牛心肺等，火候合適令肉質不會太軟爛，稍有嚼勁，加上被湯汁包裹，美味更上一層。
40元份量的牛雜兩個人吃剛剛好，選擇豐富，滋味無窮。
下載APP