叫得做首創,就梗係最正宗啦!嚟到司打口順記新永寶火鍋城,呢度老闆娘夏蓮定(蓮姐)一定介紹你食呢個招牌胡椒豬骨煲。店內還有新鮮爆膏的鹽焗蟹、配啤酒一流的惹味小菜富貴炸芋片、椒鹽龍脷仔及椒鹽九肚魚等等,街坊熟客們一邊睇世界盃更食至舐舐脷。
(前方左二)老闆娘蓮姐與一班街坊熟客早如老友記,大家每次來都叫滿一枱佐酒小食,與蓮姐邊喝邊聊。
世界盃期間特別多街坊來順記捧場,一有入波全場歡呼好熱鬧。
老闆娘蓮姐指豬骨煲最初是以碟頭上桌,她憶述:「呢個餸係廿八年前我同老公諗出嚟嘅!嗰陣細細煲,入面有加花生。而家就有支竹、雞腳入饌,以胡椒同秘製配方做湯底係想創新,豬骨都係日日新鮮嚟,嚴選豬腳嘅下截,貪佢有筋食落頭,做呢行係要諗啲新鮮嘢吸引客人。新推出的鹽焗蟹也一樣,我哋用新鮮爆膏嘅奄仔蟹,都係我哋想試新嘢。」
以「始創澳門胡椒豬骨煲」做主打,廿八年來都是順記的生招牌。
鹽焗斗門奄仔蟹
鹽焗蟹則選用斗門鹹淡水交界處的奄仔蟹,貪其一年四季都鮮甜肉質夠靚、蟹殼帶光彩。首先令蟹失去知覺,然後才去蒸焗蟹爪便不會斷。將奄仔蟹放入熱鹽中焗熟,蟹肉帶淡淡鹹味,肉質會較實淨而蟹膏鹹香,邊食邊歎冰凍啤酒更是風味絕佳。蓮姐指這道菜是即叫即做,需時半小時,呼籲大家嚟到好即刻點菜,以免久等。
鹽焗蟹選用斗門鹹淡水交界處的奄仔蟹,肉質鮮味。
九唔搭八炒芋片
店內另一道菜本來叫「九唔搭八」,蓮姐笑言是因為把多種食材混合同炒的緣故而命名。蓮姐說:「這道『九唔搭八』亦係我哋做起先,講起都廿年咯!起初用手切芋件,但做不出效果來;後來改良後用芋片,改名為錦鏽炸芋片。」材料除了芋片更有腰果、蝦乾,炸完再椒鹽,看起來又真的頗九唔搭八。
錦鏽炸芋片及椒鹽龍脷仔皆是佐酒小菜之選。
info
順記新永寶火鍋城
地址:司打口火船頭街223號
電話:2893 7808